Cam' Ye O'er Frae France?

Cam' ye o'er frae France? Cam' ye doon by Lunnon?
Saw ye Geordie Whelps and his bonny woman?
Wert ye at t' place ca'd t' Kittle Hoosie?
Saw ye Geordie's grace riding on a goosie?

Geordie, he's a man; there is little doot o't.
He's done a' he can; wha can live wi'oot it?
Doon there cam' a blad, linkin' like me Lordie:
he wad drive a trad at the lum o' Geordie.

Though the claith were bad, blythely may we niffer;
gin we git oor wab, it mak's little differ.
We hae tint oor plaid, bonnet, belt and swordie,
ha's and mailins braid, but we hae a Geordie!

Jockey's gane tae France, and Montgomery's lady;
there they'll learn tae dance: "Madam, are ye ready?"
They'll be back belyve, belted brisk and lordly;
brawly may they thryve to dance a jig for Geordie!

Hey! for Sandy Don, hey! for Cockalorum,
hey! for Bobbin' John and his Hieland quorum:
mony's the sword and lance swings at Hieland hurdie;
how they'll skip and dance o'er the bum o' Geordie!